ᠨᠠᠪᠴᠢᠨ ᠳᠤ ᠮᠡᠯᠳᠡᠭᠡᠨᠡᠭᠰᠡᠨ ᠰᠢᠭᠦᠳᠡᠷᠢ ᠶᠢ ᠬᠠᠷᠠᠬᠤ ᠲᠤᠰᠤᠮ ᠵᠢᠷᠦᠬᠡᠨ ᠳᠤ ᠬᠤᠨᠤᠭᠰᠢᠭᠰᠠᠨ ᠬᠠᠨᠢ ᠨᠦᠬᠦᠷ ᠮᠢᠨᠢ ᠰᠠᠨᠠᠭᠳᠠᠭᠠᠳ ᠪᠠᠶᠢᠨᠠ᠃ ᠲᠡᠷᠡ | ᠰᠢᠭᠦᠳᠡᠷᠢ ᠶᠢᠨ ᠲᠤᠰᠤᠯ ᠡᠯᠢᠭᠡ ᠵᠢᠷᠦᠬᠡ ᠪᠠᠨ ᠬᠤᠯᠪᠤᠭᠰᠠᠨ ᠬᠠᠨᠢ ᠶᠢᠨ ᠮᠢᠨᠢ ᠬᠤᠶᠠᠷ ᠨᠢᠳᠦ ᠰᠢᠭ ᠲᠤᠷᠮᠤᠯᠵᠠᠨᠠ᠃ ᠴᠢᠮᠠ ᠳᠤ ᠦᠯᠡᠳᠡᠭᠡᠭᠰᠡᠨ ᠬᠠᠶᠢᠷᠠ ᠮᠢᠨᠢ | ᠦᠰᠦᠨ ᠳᠤ ᠲᠡᠮᠳᠡᠭᠰᠢᠵᠦ ᠪᠤᠭᠤᠷᠤᠯᠳᠤᠯᠠ᠃ ᠬᠠᠶᠢᠷᠠ ᠶᠢᠨ ᠬᠠᠶᠢᠷᠠ ᠳᠤ ᠲᠠᠳᠠᠭᠳᠠᠵᠤ ᠪᠡᠶᠡ ᠦᠳᠡᠯᠦᠯᠡ᠃ | ᠤᠷᠴᠢᠯᠠᠩ ᠤᠨ ᠵᠢᠮᠡ ᠪᠠᠷ ᠤᠨ ᠤ ᠬᠦᠷᠳᠦ ᠶᠢᠨ ᠡᠷᠭᠢᠯᠳᠡ ᠳᠤ ᠡᠳᠦᠷ ᠬᠤᠨᠤᠭ ᠦᠩᠭᠡᠷᠡᠨ ᠲᠦᠷᠪᠡᠨ ᠤᠯᠠᠷᠢᠯ ᠰᠤᠯᠢᠭᠳᠠᠭᠰᠠᠭᠠᠷ ᠠᠭᠤᠯᠠ ᠲᠤᠯᠤᠭᠠᠳ | ᠤᠨᠢᠶᠠᠷᠳᠤᠵᠤ ᠨᠠᠭᠤᠷ ᠪᠦᠷᠢᠳᠦ ᠮᠡᠯᠮᠡᠯᠵᠡᠨ ᠤᠰᠤᠨ ᠤ ᠰᠢᠪᠠᠭᠤᠳ ᠶᠢᠰᠦᠨ ᠬᠡᠯᠡ ᠪᠠᠷ ᠡᠭᠡᠰᠢᠭᠯᠡᠵᠦ ᠡᠪᠡᠰᠦ ᠨᠤᠭᠤᠭᠠ ᠴᠤᠬᠤᠶᠢᠨ ᠴᠡᠴᠡᠭ ᠮᠤᠳᠤ ᠪᠠᠳᠮᠠᠯᠠᠨ | ᠲᠡᠯᠭᠡᠷᠡᠵᠦ᠂ ᠨᠤᠭᠤᠭᠠᠨ ᠢᠶᠠᠷ ᠲᠤᠯᠬᠢᠶᠠᠯᠠᠬᠤ ᠬᠤᠷᠸᠠ ᠳᠤ ᠵᠤᠨ ᠰᠠᠭᠠᠳᠠᠯᠠ᠃ ᠪᠢ ᠴᠡᠴᠡᠭ ᠤᠨ ᠰᠤᠷᠭᠤᠭ ᠦᠨᠦᠷ ᠢ ᠲᠠᠭᠠᠵᠤ ᠴᠢᠮᠠ ᠪᠠᠨ ᠤᠯᠠᠨ ᠦᠩᠭᠡ ᠪᠠᠷ | ᠦᠯᠢᠭᠡᠷᠯᠡᠨ ᠪᠤᠳᠤᠪᠠ᠃ ᠬᠠᠨᠢ ᠨᠦᠬᠦᠷ ᠮᠢᠨᠢ ᠶᠢᠰᠦᠨ ᠬᠡᠯᠡ ᠪᠠᠷ ᠡᠭᠡᠰᠢᠭᠯᠡᠬᠦ ᠰᠢᠪᠠᠭᠤ ᠬᠤᠪᠢᠯᠤᠨ ᠲᠠᠭᠤᠯᠠᠵᠤ ᠪᠠᠶᠢᠨᠠ ᠭᠡᠳ ᠲᠡᠷᠡ ᠰᠢᠪᠠᠭᠤᠳ ᠢ ᠦᠨᠡᠨ | ᠵᠢᠷᠦᠬᠡᠨ ᠠᠴᠠ ᠪᠠᠨ ᠬᠠᠶᠢᠷᠠᠯᠠᠨ ᠬᠠᠮᠠᠭᠠᠯᠠᠨᠠ᠃ ᠴᠢ ᠮᠢᠨᠢ ᠴᠡᠴᠡᠭ ᠤᠨ ᠲᠤᠮᠳᠠ ᠠᠮᠢᠯᠠᠵᠤ᠂ ᠴᠡᠴᠡᠭ ᠮᠡᠳᠦ ᠭᠤᠶᠤ ᠬᠡᠬᠡᠨᠴᠢᠷᠬᠡᠨ ᠬᠠᠷᠠᠭᠳᠠᠨ᠂ ᠮᠢᠨᠦ ᠵᠢᠷᠦᠬᠡᠨ ᠳᠤ | ᠦᠨᠢᠳᠡ ᠠᠮᠢᠳᠤᠷᠠᠳᠠᠭ ᠡ᠃ | ᠨᠠᠮ ᠵᠢᠮ ᠰᠦᠨᠢ ᠶᠢ ᠬᠦᠨᠳᠡᠵᠦ ᠰᠢᠯ ᠭᠡᠭᠡᠪᠴᠢᠨ ᠲᠡᠭᠡᠷᠡ ᠰᠢᠪᠡᠷᠡᠭᠡ ᠬᠤᠷᠠ ᠲᠤᠰᠤᠯᠠᠬᠤ ᠨᠢ ᠢᠷᠠᠭᠤᠬᠠᠨ ᠵᠦᠭᠡᠯᠡᠨ ᠠᠶᠠ ᠲᠠᠢ ᠶᠠᠳᠤᠭᠠ ᠶᠢᠨ ᠲᠠᠭᠤ | ᠭᠡᠵᠦ ᠡ᠊ᠨᠳᠡᠭᠦᠷᠡᠮᠡᠷ᠂ ᠬᠤᠷᠠ ᠶᠢᠨ ᠰᠢᠪᠡᠨᠡᠭᠡ ᠳᠤ ᠬᠦᠳᠦᠯᠦᠭᠳᠡᠵᠦ ᠬᠤᠯᠠ ᠤᠶᠢᠷᠠ ᠶᠢ ᠪᠤᠳᠤᠭᠰᠠᠭᠠᠷ ᠨᠦᠢᠷ ᠢ ᠨᠤᠬᠠᠢ ᠲᠤᠯᠢᠶᠠᠭᠰᠠᠨ ᠰᠢᠬ ᠪᠦᠬᠦᠯᠢ ᠰᠦᠨᠢ ᠶᠢ | ᠤᠨᠳᠠᠬᠤ ᠨᠦᠢᠷ ᠦᠭᠡᠢ ᠦᠩᠭᠡᠷᠡᠭᠡᠯᠡ᠃ ᠦᠷᠯᠦᠭᠡ ᠡᠷᠳᠡ ᠪᠤᠰᠤᠭᠠᠳ ᠴᠤᠩᠬᠤ ᠪᠠᠨ ᠨᠡᠭᠡᠭᠡᠵᠦ ᠴᠡᠪᠡᠷ ᠠᠭᠠᠷ ᠠᠮᠢᠰᠬᠤᠯ ᠤᠷᠤᠭᠤᠯᠵᠤ ᠭᠠᠳᠠᠭᠰᠢ ᠰᠢᠷᠳᠡᠬᠦ ᠳᠤ | ᠨᠠᠶᠢᠷᠠᠭ ᠲᠤ ᠤᠶᠠᠩᠭᠠᠷᠠᠭᠰᠠᠨ ᠠᠶᠢᠯ ᠤᠰᠤᠨ ᠤ ᠰᠦᠯᠳᠡ ᠪᠤᠯᠤᠭᠰᠠᠨ ᠱᠠᠩᠰᠢ ᠶᠢᠨ ᠮᠤᠳᠤ᠂ ᠠᠶᠢᠷᠠᠭ ᠲᠤ ᠠᠮᠢᠯᠠᠭᠰᠠᠨ ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠨᠤᠳᠤᠭ ᠤᠨ | ᠬᠦᠮᠦᠨ ᠮᠦᠰᠦᠨ ᠳᠡᠭᠡᠨ ᠬᠡᠰᠢᠭ ᠬᠤᠷᠦ᠋ᠢᠯᠠᠵᠤ ᠬᠡᠶᠢᠮᠤᠷᠢ ᠲᠠᠯᠠᠯᠤᠨᠠ᠃ ᠨᠠᠪᠳᠠᠭ ᠰᠠᠪᠳᠠᠭ ᠲᠠᠢ ᠡᠪᠦᠭᠡᠨ ᠱᠠᠩᠰᠢ᠂ ᠬᠠᠨᠢ ᠶᠢ ᠮᠢᠨᠢ ᠡᠭᠡᠭᠦᠯᠡᠨ ᠠᠪᠴᠢᠷᠠᠵᠤ ᠦᠭᠬᠦ | ᠪᠤᠯᠪᠠ ᠤᠤ ᠭᠡᠵᠦ ᠮᠦᠷᠭᠦᠨ ᠵᠠᠯᠪᠠᠷᠢᠨᠠ᠃ | ᠨᠠᠮᠤᠭᠤᠬᠠᠨ ᠦᠷᠯᠦᠭᠡ ᠬᠦᠳᠡᠭᠡ ᠠᠶᠢᠯ ᠤᠨ ᠵᠡᠷᠭᠡᠴᠡᠨ ᠪᠠᠶᠢᠷᠢᠰᠢᠭᠰᠠᠨ ᠤᠯᠠᠭᠠᠨ ᠲᠤᠭᠤᠰᠬᠠᠨ ᠭᠡᠷ ᠤᠳ ᠤᠨ ᠬᠤᠯᠠᠩ ᠠᠴᠠ ᠤᠳᠤᠭᠠ ᠰᠤᠭᠤᠨᠠᠭᠯᠠᠨ | ᠮᠦᠩᠭᠡ ᠬᠦᠭᠡ ᠲᠡᠭᠷᠢ ᠶᠢᠨ ᠢᠪᠡᠭᠡᠭᠰᠡᠨ ᠬᠤᠷᠠ ᠠᠴᠢᠶᠠᠯᠠᠭᠰᠠᠨ ᠡᠭᠦᠯᠡᠰ ᠲᠠᠢ ᠠᠮᠤᠷ ᠮᠡᠨᠳᠦ ᠡᠷᠢᠨ ᠵᠤᠯᠭᠠᠯᠴᠠᠨᠠ᠃ ᠬᠤᠷᠠ ᠠᠴᠢᠶᠠᠯᠠᠭᠰᠠᠨ ᠡᠭᠦᠯᠡᠰ ᠤᠨ ᠲᠤᠮᠳᠠ | ᠠᠮᠠᠷᠠᠭ ᠬᠠᠨᠢ ᠮᠢᠨᠢ ᠴᠦ ᠪᠠᠶᠢᠬᠤ ᠶᠤᠮ ᠭᠡᠵᠦ ᠰᠠᠨᠠᠭᠠ ᠠᠯᠳᠠᠨ ᠬᠤᠷᠮᠤᠰᠳᠠ ᠲᠡᠭᠷᠢ ᠦᠭᠡᠳᠡ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠰᠢᠷᠳᠡᠨᠡ᠃ ᠬᠠᠶᠠ ᠬᠠᠶᠠ ᠵᠦᠭᠡᠯᠡᠨ | ᠰᠠᠯᠬᠢᠨ ᠬᠠᠴᠠᠷ ᠨᠢᠭᠤᠷ ᠢ ᠢᠯᠪᠢᠨ ᠦᠩᠭᠡᠷᠡᠬᠦ ᠳᠤ ᠨᠠᠮᠠ ᠶᠢ ᠦᠵᠡᠬᠦ ᠪᠠᠷ ᠢᠷᠡᠭᠰᠡᠨ ᠪᠠᠶᠢᠬᠤ ᠭᠡᠵᠦ ᠪᠤᠳᠤᠨᠠ᠃ | ᠦᠳᠡᠰᠢ ᠶᠢᠨ ᠨᠠᠮ ᠰᠡᠯᠡᠬᠦᠭᠡᠨ ᠳᠤ ᠰᠤᠭᠤᠷᠠᠵᠤ ᠦᠰᠦᠭᠰᠡᠨ ᠪᠤᠯᠪᠠᠷᠠᠢ ᠵᠦᠭᠡᠯᠡᠨ ᠨᠠᠪᠴᠢᠨ ᠳᠤ ᠴᠡᠪᠡᠷ ᠲᠤᠩᠭᠠᠯᠠᠭ ᠰᠢᠭᠦᠳᠡᠷᠢ ᠮᠡᠯᠳᠡᠭᠡᠨᠡᠬᠦ ᠨᠢ ᠵᠢᠷ ᠵᠢᠷ | ᠵᠢᠷᠭᠢᠬᠦ ᠪᠤᠯᠵᠤᠮᠤᠷ ᠤᠨ ᠨᠢᠳᠦ ᠰᠢᠭ ᠲᠤᠷᠮᠤᠯᠵᠠᠨᠠ᠃ ᠲᠡᠷᠭᠡᠳᠡ ᠨᠢ ᠪᠠᠶᠢᠭᠠ ᠬᠡᠳᠦᠨ ᠪᠤᠯᠵᠤᠮᠤᠷ ᠴᠦ ᠲᠤᠷᠮᠤᠯᠵᠠᠬᠤ ᠰᠢᠭᠦᠳᠡᠷᠢ ᠨᠢ ᠤᠮᠳᠠᠯᠠᠬᠤ ᠪᠠᠷ ᠬᠦᠵᠦᠭᠦᠤ | ᠰᠡᠭᠡᠷ ᠭᠤᠵᠦ᠋ᠢᠯᠭᠠᠨ ᠬᠡᠨ ᠠᠯᠢᠨ ᠳᠠᠭᠠᠨ ᠴᠦ ᠬᠠᠶᠢᠷᠠ ᠨᠠᠶᠢᠷ ᠲᠠᠯᠪᠢᠬᠤ ᠦᠭᠡᠢ ᠨᠠᠪᠴᠢᠰ ᠰᠡᠭᠰᠤᠷᠴᠤ ᠱᠤᠯᠤᠭᠠᠨᠠᠨᠠ᠃ ᠬᠠᠨᠢ ᠶᠢᠨ ᠮᠢᠨᠢ ᠬᠠᠶᠢᠷᠠ | ᠲᠤᠶᠠᠭᠠᠷᠠᠭᠰᠠᠨ ᠬᠤᠣᠰ ᠠᠯᠠᠭ ᠨᠢᠳᠦ ᠨᠢ ᠲᠤᠷᠮᠤᠯᠵᠠᠬᠤ ᠰᠢᠬ ᠬᠠᠯᠠᠭᠤᠨ ᠲᠤᠯᠠᠭᠠᠬᠠᠨ ᠰᠠᠨᠠᠭᠳᠠᠬᠤ ᠲᠤᠯᠠ ᠪᠢ ᠴᠦ ᠲᠡᠷᠡ ᠬᠡᠳᠦᠨ ᠪᠤᠯᠵᠤᠮᠤᠷ ᠠᠴᠠ ᠵᠠᠪᠳᠤᠨ | ᠮᠦᠩᠭᠦᠨ ᠰᠢᠭᠦᠳᠡᠷᠢ ᠶᠢ ᠵᠢᠷᠦᠬᠡ ᠰᠡᠳᠭᠢᠯ ᠳᠡᠭᠡᠨ ᠠᠭᠤᠰᠬᠠᠬᠤ ᠪᠠᠷ ᠴᠢᠷᠮᠠᠶᠢᠨᠠ᠃ ᠨᠠᠪᠴᠢᠨ ᠳᠤ ᠮᠡᠯᠳᠡᠭᠡᠨᠡᠭᠰᠡᠨ ᠰᠢᠭᠦᠳᠡᠷᠢ ᠶᠢ ᠭᠠᠭᠴᠠᠭᠠᠷ ᠢᠶᠠᠨ ᠦᠵᠡᠭᠰᠡᠭᠡᠷ | ᠠᠷᠪᠠᠨ ᠵᠢᠯ ᠢ ᠦᠩᠭᠡᠷᠡᠭᠦᠯᠴᠢᠭᠡᠯᠡ᠃ ᠵᠢᠯ ᠵᠢᠯ ᠤᠨ ᠵᠤᠨ ᠢ ᠡᠷᠳᠡᠬᠡᠨ ᠢᠷᠡᠭᠡᠰᠡᠢ ᠭᠡᠵᠦ ᠬᠦᠰᠡᠨ ᠮᠦᠷᠦᠭᠡᠳᠦᠨᠡ ᠁ | ᠠᠶᠢᠯ ᠰᠠᠭᠠᠬᠠᠯᠳᠠ ᠪᠠᠷ ᠢᠶᠠᠨ ᠨᠢᠭᠡ ᠡᠳᠦᠷ ᠤᠨ ᠠᠵᠢᠯ ᠢᠶᠠᠨ ᠡᠬᠢᠯᠡᠭᠦᠯᠵᠦ ᠰᠠᠭᠤᠳᠠᠯ ᠦᠭᠡᠢ ᠶᠠᠭᠠᠷᠠᠯᠳᠤᠨᠠ᠃ ᠬᠦᠳᠡᠯᠮᠦᠷᠢ ᠬᠦᠮᠦᠨ ᠢ ᠭᠤᠮᠤᠳᠠᠭᠠᠳᠠᠭ | ᠦᠭᠡᠢ ᠭᠡᠳᠡᠭ ᠢᠶᠠᠷ ᠬᠦᠳᠡᠯᠮᠦᠷᠢᠴᠢᠨ ᠲᠦᠮᠡᠨ ᠤ ᠬᠦᠯᠦᠰᠦᠨ ᠲᠤᠰᠤᠯ ᠤᠨ ᠬᠠᠷᠢᠭᠤ ᠳᠤ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠨᠢ ᠲᠠᠷᠭᠤ ᠬᠦᠴᠦ ᠲᠠᠢ ᠦᠨᠢᠷ ᠦᠰᠦᠭᠡᠳ | ᠮᠠᠯᠴᠢᠨ ᠲᠦᠮᠡᠨ ᠳᠤ ᠪᠠᠶᠠᠷ ᠪᠠᠶᠠᠰᠤᠯ ᠬᠦᠷᠭᠡᠵᠦ ᠠᠵᠢᠯ ᠤᠨ ᠶᠠᠳᠠᠷᠠᠭᠠ ᠶᠢ ᠨᠢ ᠲᠠᠶᠢᠯᠤᠨᠠ᠃ ᠡᠨᠡ ᠨᠢ ᠦᠩ ᠡᠯᠪᠡᠭ ᠵᠤᠨ ᠪᠤᠯᠬᠤ ᠶᠢᠨ ᠪᠡᠯᠭᠡ ᠲᠡᠮᠪᠡᠷᠡᠯ ᠪᠠᠶᠢᠬᠤ | ᠡ᠃ ᠤᠯᠠᠨ ᠤ ᠡᠶᠢᠮᠦ ᠪᠠᠶᠠᠷ ᠬᠦᠷ ᠲᠠᠢ ᠠᠮᠢᠳᠤᠷᠠᠵᠤ ᠪᠠᠶᠢᠬᠤ ᠶᠢ ᠦᠵᠡᠭᠡᠳ ᠮᠢᠨᠦ ᠠᠮᠠᠷᠠᠭ ᠬᠠᠨᠢ ᠪᠠᠶᠢᠭᠰᠠᠨ ᠪᠤᠯ ᠪᠢᠳᠡ ᠪᠠᠰᠠ ᠤᠯᠠᠨ ᠲᠠᠢ ᠠᠳᠠᠯᠢ ᠪᠠᠶᠠᠷ | ᠵᠢᠷᠭᠠᠯᠳᠠᠢ ᠠᠮᠢᠳᠤᠷᠠᠬᠤ ᠶᠤᠮ ᠭᠡᠵᠦ ᠵᠤᠪᠠᠵᠤ ᠭᠤᠳᠤᠷᠠᠨᠠ᠃ ᠪᠢ ᠬᠠᠨᠢ ᠨᠦᠬᠦᠷ ᠲᠠᠢ ᠪᠠᠨ ᠪᠠᠶᠢᠭᠰᠠᠨ ᠲᠡᠷᠡ ᠵᠢᠯ ᠤᠳ ᠲᠤ ᠮᠦᠨ ᠯᠠ ᠦᠩ ᠡᠯᠪᠡᠭ ᠪᠦᠭᠡᠳ | ᠪᠦᠬᠦ ᠭᠡᠷ ᠢᠶᠠᠷ ᠢᠶᠠᠨ ᠡᠶᠡ ᠨᠠᠶᠢᠷᠰᠠᠭ ᠠᠳᠠᠯ ᠤᠨᠳᠤᠷᠤᠯᠭᠠ ᠪᠠᠨ ᠭᠢᠵᠦ ᠪᠠᠶᠢᠭᠰᠠᠨ ᠁ | ᠤᠰᠤᠨ ᠡᠭᠦᠯᠡ ᠬᠦᠪᠦᠭᠰᠡᠨ ᠮᠦᠩᠭᠡ ᠲᠡᠭᠷᠢ ᠶᠢᠨ ᠲᠡᠩᠨᠡᠢ ᠠᠴᠠ ᠰᠤᠪᠤᠳ ᠬᠡᠯᠬᠢᠶᠡᠷᠡᠭᠰᠡᠨ ᠰᠢᠭ ᠡᠮᠡᠭᠡ ᠶᠢᠨ ᠦᠨᠦᠷ ᠲᠠᠢ ᠬᠤᠷᠠ ᠶᠢᠨ ᠲᠤᠰᠤᠯ ᠨᠢ | ᠡᠬᠡ ᠶᠢᠨ ᠦᠨᠦᠷ ᠲᠠᠢ ᠨᠤᠳᠤᠭ ᠤᠨ ᠬᠦᠷᠦᠰᠦᠨ ᠳᠤ ᠲᠤᠰᠤᠯᠠᠨ ᠰᠢᠪᠡᠷᠡᠨᠡ᠃ ᠡᠨᠡ ᠬᠦᠷᠦᠰᠦᠨ ᠳᠤ ᠴᠢ ᠮᠢᠨᠢ ᠪᠠᠰᠠ ᠬᠦᠳᠡᠯᠮᠦᠷᠢ ᠶᠢᠨ ᠦᠨᠦᠷ ᠢᠶᠠᠨ | ᠰᠢᠩᠭᠡᠭᠡᠭᠰᠡᠨ ᠶᠤᠮ᠃ ᠪᠢ ᠬᠤᠯᠠ ᠶᠢᠨ ᠲᠡᠷᠡ ᠲᠠᠨᠢᠬᠤ ᠦᠭᠡᠢ ᠶᠢᠷᠳᠢᠨᠴᠤ ᠳᠤ ᠶᠠᠪᠤᠭᠰᠠᠨ ᠬᠠᠨᠢ ᠨᠦᠬᠦᠷ ᠲᠡᠭᠡᠨ ᠤᠰᠤᠯᠳᠠᠬᠤ ᠦᠭᠡᠢ ᠭᠡᠵᠦ᠂ ᠡᠷᠦᠭᠡ ᠭᠡᠷ ᠢᠶᠠᠨ | ᠦᠭᠡᠳᠡ ᠲᠠᠳᠠᠵᠤ ᠦᠨᠦᠴᠢᠨ ᠬᠤᠶᠠᠷ ᠬᠡᠦᠬᠡᠳ ᠢᠶᠠᠨ ᠬᠦᠮᠦᠨ ᠪᠤᠯᠭᠠᠬᠤ ᠪᠠᠷ ᠠᠮᠢ ᠲᠡᠮᠡᠴᠡᠨ ᠠᠵᠢᠯᠯᠠᠨᠠ᠃ | ᠡ᠊ᠩ ᠶᠡᠷᠦᠮᠳᠡᠭ ᠬᠤᠪᠴᠠᠰᠤ ᠪᠠᠨ ᠲᠡᠷᠢ ᠲᠡᠭᠰᠢ ᠡᠮᠦᠰᠦᠭᠰᠡᠨ ᠬᠠᠨᠢ ᠮᠢᠨᠢ ᠬᠠᠰᠢᠶᠠ ᠰᠠᠷᠠᠪᠴᠢᠨ ᠳᠠᠭᠠᠨ ᠦᠨᠢᠶᠡ ᠰᠠᠭᠠᠵᠤ ᠰᠠᠭᠤᠯᠠᠭᠠ ᠲᠦᠭᠦᠷᠡᠩ ᠰᠦ | ᠬᠦᠭᠡᠰᠦᠷᠡᠭᠦᠯᠦᠨ ᠮᠠᠩᠨᠠᠢ ᠲᠡᠨ᠋ᠶᠢᠨ ᠮᠡᠯᠮᠡᠢ ᠮᠡᠯᠮᠡᠷᠡᠭᠦᠯᠦᠨ ᠬᠦᠯᠦᠰᠦ ᠲᠤᠰᠤᠯᠭᠠᠵᠤ ᠪᠠᠶᠠᠷ ᠪᠠᠶᠠᠰᠤᠯ ᠲᠠᠢ ᠴᠢᠷᠠᠢ ᠢᠯᠡᠷᠡᠭᠦᠯᠬᠦ ᠳᠤ ᠬᠠᠵᠠᠭᠤ ᠠᠴᠠ ᠨᠢ ᠴᠠᠳᠳᠠᠯᠠ | ᠬᠦᠬᠦᠭᠰᠡᠨ ᠲᠤᠭᠤᠯ ᠤᠳ ᠡ᠊ᠩᠭᠡᠷ ᠬᠤᠷᠮᠤᠢ ᠶᠢ ᠨᠢ ᠲᠤᠯᠢᠶᠠᠨ ᠲᠤᠭᠯᠠᠯᠳᠤᠵᠤ ᠪᠠᠶᠢᠭᠰᠠᠨ ᠨᠢ ᠤᠳᠤ ᠪᠤᠯᠳᠠᠯᠠ ᠨᠢᠳᠦᠨ ᠳᠤ ᠦᠵᠡᠭᠳᠡᠨ ᠦᠪᠡᠷ ᠤᠨ ᠡᠷᠭᠡ ᠦᠭᠡᠢ | ᠡᠯᠢᠭᠡ ᠵᠢᠷᠦᠭᠡ ᠲᠠᠳᠠᠯᠳᠤᠭᠠᠳ ᠪᠠᠶᠢᠨᠠ᠃ ᠦᠩᠭᠡᠷᠡᠭᠰᠡᠨ ᠤᠨ ᠵᠢᠯ ᠤᠳ ᠲᠤ ᠠᠪᠤ ᠡᠵᠢ ᠭᠡᠳ ᠭᠡᠷ ᠲᠡᠭᠡᠨ ᠵᠦᠭᠡᠷ ᠠᠮᠠᠷᠠᠵᠤ ᠰᠠᠭᠤᠭᠰᠠᠨ ᠦᠭᠡᠢ᠃ ᠠᠪᠤ | ᠨᠠᠮᠠ ᠶᠢ ᠬᠠᠮᠵᠢᠨ ᠬᠠᠰᠢᠶᠠ ᠬᠦᠷᠢᠶᠡ ᠴᠡᠪᠡᠷᠯᠡᠵᠦ᠂ ᠤᠨᠤᠭᠠ ᠮᠠᠯ ᠳᠤ ᠡᠪᠡᠰᠦ ᠪᠤᠷᠳᠤᠭᠠ ᠨᠡᠮᠡᠨ᠂ ᠵᠢᠭᠠᠬᠠᠨ ᠵᠠᠪ ᠴᠢᠯᠦᠭᠡ ᠭᠠᠷᠪᠠᠯ ᠨᠤᠭᠤᠭᠠᠨ ᠬᠠᠰᠢᠶᠠᠨ ᠳᠤ | ᠤᠷᠤᠵᠤ ᠵᠢᠷᠭᠤᠭᠠᠨ ᠬᠦᠮᠦᠨ ᠠᠮᠠ ᠶᠢᠨ ᠡᠳᠦᠷ ᠤᠨ ᠢᠳᠡᠬᠦ ᠨᠤᠭᠤᠭᠠ ᠴᠠᠭᠠ ᠶᠢ ᠲᠠᠷᠢᠵᠤ ᠠᠷᠠᠴᠢᠯᠠᠨᠠ᠃ ᠡᠵᠢ ᠰᠦ ᠲᠠᠢ ᠴᠠᠢ ᠪᠤᠴᠠᠯᠭᠠᠵᠤ ᠤᠮᠪᠤᠯᠤ | ᠲᠤᠮᠪᠤᠯᠤ ᠳᠠᠭᠠᠨ ᠦᠷᠯᠦᠭᠡ ᠶᠢᠨ ᠬᠤᠭᠤᠯᠠ ᠶᠢ ᠨᠢ ᠢᠳᠡᠭᠦᠯᠵᠦ ᠰᠤᠷᠭᠠᠭᠤᠯᠢ ᠳᠤᠨᠢ ᠬᠦᠷᠭᠡᠵᠦ ᠶᠠᠭᠠᠷᠠᠨᠠ᠃ ᠲᠡᠷᠡ ᠦᠶᠡ ᠳᠤ ᠦᠳᠡᠯᠦᠭᠡ ᠵᠠᠯᠠᠭᠤ ᠦᠷᠪᠡᠭᠡ | ᠴᠤᠷᠪᠠᠭᠠ ᠲᠠᠢ ᠪᠠᠨ ᠦᠨᠡᠭᠡᠷ ᠪᠠᠶᠠᠷ ᠵᠢᠷᠭᠠᠯᠳᠠᠢ ᠠᠮᠢᠳᠤᠷᠠᠵᠤ ᠪᠠᠶᠢᠭᠰᠠᠨ ᠁ | ᠲᠡᠶᠢᠮᠦ ᠰᠠᠶᠢᠬᠠᠨ ᠰᠡᠳᠭᠢᠯ ᠲᠠᠭᠠᠷᠠᠨ ᠠᠮᠢᠳᠤᠷᠠᠵᠤ ᠪᠠᠶᠢᠭᠰᠠᠨ ᠭᠡᠷ ᠪᠦᠯᠢ ᠳᠤ ᠭᠡᠨᠡᠳᠳᠡ ᠵᠤᠯ ᠪᠤᠰᠤ ᠤᠴᠢᠷ ᠲᠤᠬᠢᠶᠠᠯᠳᠤᠯᠠ᠃ ᠬᠠᠨᠢ ᠮᠢᠨᠢ ᠭᠡᠨᠡᠳᠳᠡ ᠶᠢᠨ | ᠡᠪᠡᠳᠴᠢᠨ ᠢᠶᠠᠷ ᠤᠷᠴᠢᠯᠠᠩ ᠠᠴᠠ ᠦᠨᠢᠳᠡ ᠰᠠᠯᠵᠤ ᠪᠢᠳᠡᠨ ᠢ ᠬᠠᠶᠠᠭᠠᠳ ᠶᠠᠪᠤᠴᠢᠬᠠᠯᠠ᠃ ᠲᠡᠷᠡ ᠵᠢᠯ ᠠᠴᠠ ᠡᠬᠢᠯᠡᠨ ᠭᠤᠨᠢᠭ ᠵᠦᠳᠡᠭᠦᠷᠢᠳᠡᠢ ᠠᠮᠢᠳᠤᠷᠠᠯ ᠤᠨ | ᠪᠤᠷᠤ ᠲᠤᠭᠤᠰᠤᠨ ᠳᠤ ᠠᠳᠠᠯ ᠤᠨᠳᠤᠷᠤᠯᠭᠠ ᠭᠡᠳ ᠮᠠᠯᠠᠭᠠᠢ ᠪᠠᠨ ᠠᠪᠤᠪᠠᠯ ᠡᠵᠢ᠂ ᠮᠠᠯᠠᠭᠠᠢ ᠪᠠᠨ ᠡᠮᠦᠰᠪᠡᠯ ᠠᠪᠤ ᠪᠤᠯᠵᠤ ᠬᠠᠷᠠ ᠪᠤᠷᠤ ᠠᠵᠢᠯ ᠢ ᠬᠠᠨᠳᠠᠯᠠ ᠬᠢᠵᠦ᠂ | ᠨᠢᠭᠡ ᠮᠡᠳᠡᠬᠦ ᠳᠤ ᠠᠷᠪᠠᠨ ᠵᠢᠯ ᠪᠤᠯᠴᠢᠬᠠᠯᠠ᠃ | ᠦᠷᠦᠴᠡ ᠵᠢᠷᠦᠬᠡᠨ ᠳᠤ ᠬᠤᠯᠪᠤᠭᠠ ᠲᠠᠢ ᠬᠠᠨᠢ ᠮᠢᠨᠢ ᠠᠯᠮᠤᠷᠠᠳ ᠤᠨ ᠤᠯᠠᠭᠠᠨ ᠬᠠᠴᠠᠷ ᠲᠡᠭᠡᠷᠡ ᠪᠠᠨ ᠤᠳᠠᠨ ᠨᠠᠪᠴᠢᠨ ᠬᠦᠮᠦᠰᠭᠡ ᠲᠠᠢ ᠬᠦᠢᠯᠡᠰᠦ ᠠᠳᠠᠯᠢ | ᠬᠤᠶᠠᠷ ᠨᠢᠳᠦ ᠪᠠᠨ ᠲᠤᠷᠮᠤᠯᠵᠠᠭᠤᠯᠤᠨ ᠦᠳᠡᠯᠦᠭᠡ ᠨᠠᠰᠤᠳᠠᠨ ᠢᠶᠠᠨ ᠬᠦᠨᠳᠦᠯᠡᠨ ᠠᠰᠠᠷᠠᠵᠤ ᠦᠷᠡ ᠬᠡᠦᠬᠡᠳ ᠢᠶᠠᠨ ᠦᠭᠦᠭᠡᠷᠳᠡᠨ ᠪᠦᠪᠠᠶᠢᠯᠡᠵᠦ᠂ ᠨᠠᠮᠠ ᠶᠢ | ᠬᠠᠪᠰᠤᠷᠤᠨ ᠠᠵᠢᠯ ᠬᠢᠵᠦ ᠪᠠᠶᠢᠭᠰᠠᠨ ᠤᠶᠢᠯᠡ ᠬᠦᠳᠡᠯᠦᠯ ᠴᠢᠨᠢ ᠰᠢᠩᠭᠡᠭᠡᠯᠳᠡ ᠶᠢᠨ ᠮᠠᠰᠢᠨ ᠳᠤ ᠲᠦᠷᠰᠦᠵᠢᠭᠰᠡᠨ ᠮᠡᠳᠦ ᠡᠯᠢᠭᠡ ᠵᠢᠷᠦᠬᠡᠨ ᠳᠤ ᠬᠤᠨᠤᠭᠰᠢᠨ ᠦᠵᠡᠬᠦ | ᠨᠢᠳᠦᠨ ᠳᠤ ᠲᠤᠳᠤᠷᠠᠳᠠᠭ ᠪᠢᠯᠡ᠃ ᠴᠢ ᠮᠢᠨᠢ ᠬᠤᠶᠠᠷ ᠨᠢᠯᠬᠠ ᠶᠢᠨ ᠢᠶᠠᠨ ᠲᠦᠯᠦᠭᠡ ᠪᠢᠳᠡᠭᠡᠢ ᠰᠠᠨᠠᠭᠠᠰᠢᠷᠠᠵᠤ ᠵᠤᠪᠠᠭᠠᠷᠠᠢ︕ ᠪᠢ ᠪᠠᠰᠠ ᠬᠦᠮᠦᠨ ᠤ | ᠤᠷᠴᠢᠯᠠᠩ ᠳᠤ ᠠᠮᠢᠳᠤ ᠪᠠᠶᠢᠭᠰᠠᠭᠠᠷ ᠭᠡᠳᠡᠭ ᠢ ᠪᠠᠳᠤ ᠴᠡᠭᠡᠵᠢᠯᠡᠭᠡᠷᠡᠢ︕ ᠪᠢ ᠡᠨᠡ ᠠᠷᠪᠠᠨ ᠵᠢᠯ ᠳᠤ ᠬᠤᠶᠠᠷ ᠬᠡᠦᠬᠡᠳ ᠢᠶᠠᠨ ᠲᠤᠳᠤᠮᠳᠠᠨ ᠦᠰᠭᠡᠵᠦ | ᠴᠢᠮᠠ ᠳᠠᠭᠠᠨ ᠤᠰᠤᠯᠳᠠᠬᠤ ᠵᠦᠢᠯ ᠢ ᠬᠢᠭᠰᠡᠨ ᠦᠭᠡᠢ᠃ ᠬᠠᠨᠢ ᠮᠢᠨᠢ ᠡ᠂ ᠰᠡᠳᠭᠢᠯ ᠠᠮᠤᠷ ᠪᠤᠶᠠᠨ ᠵᠢᠷᠭᠠᠯ ᠡᠳ᠋ᠯᠡᠬᠦ ᠪᠠᠷ ᠲᠦᠷᠭᠡᠨ ᠢᠷᠡᠭᠡᠷᠡᠢ᠃ ᠲᠡᠷᠡ ᠯᠠ | ᠡᠳᠦᠷ ᠠᠴᠠ ᠡᠬᠢᠯᠡᠨ ᠰᠡᠭᠡᠰᠭᠢᠵᠦ᠂ ᠰᠡᠳᠭᠢᠯ ᠢᠶᠠᠨ ᠬᠠᠳᠠᠭᠤᠵᠢᠭᠤᠯᠠᠨ ᠪᠤᠳᠤᠯ ᠢᠶᠠᠨ ᠴᠢᠩᠭᠠᠯᠠᠵᠤ ᠦᠳᠡᠯᠦᠭᠡ ᠠᠪᠤ ᠡᠵᠢ ᠲᠠᠢ ᠪᠠᠨ ᠭᠤᠷᠪᠠᠭᠤᠯᠠ ᠦᠨᠦᠴᠢᠨ | ᠬᠤᠶᠠᠷ ᠨᠢᠯᠬᠠ ᠪᠠᠨ ᠲᠤᠳᠤᠮᠳᠠᠨ ᠠᠮᠢᠳᠤᠷᠠᠯ ᠤᠨ ᠬᠠᠯᠠ ᠲᠠᠮᠤ ᠶᠢ ᠢᠯᠠᠨ ᠲᠠᠪᠠᠨᠠ᠃ ᠬᠤᠶᠠᠷ ᠨᠢᠯᠬᠠ ᠮᠢᠨᠢ ᠠᠩᠭᠠᠬᠠᠢ ᠠᠴᠠ ᠲᠡᠭᠳᠡᠭᠡᠭᠡᠢ ᠪᠤᠯᠵᠤ ᠲᠡᠷᠪᠡᠯᠵᠡᠨ | ᠨᠢᠰᠬᠦ ᠬᠡᠮᠵᠢᠶᠡᠨ ᠳᠤ ᠬᠦᠷᠴᠦ ᠠᠵᠢᠯ ᠤᠨ ᠪᠠᠶᠢᠷᠢ ᠲᠠᠢ᠂ ᠠᠶᠢᠯ ᠭᠡᠷ ᠪᠤᠯᠵᠤ ᠰᠠᠶᠢᠬᠠᠨ ᠠᠮᠢᠳᠤᠷᠠᠵᠤ ᠡᠬᠢᠯᠡᠯᠡ᠃ | ᠪᠢ ᠦᠷᠡ ᠬᠡᠦᠬᠡᠳ᠂ ᠬᠠᠨᠢ ᠨᠦᠬᠦᠷ ᠲᠡᠭᠡᠨ ᠤᠰᠤᠯᠳᠠᠭᠰᠠᠨ ᠦᠭᠡᠢ ᠶᠢᠨ ᠤᠴᠢᠷ ᠴᠡᠭᠡᠵᠢ ᠲᠡᠨᠢᠭᠡᠷ᠂ ᠨᠢᠷᠤᠭᠤ ᠭᠡᠳᠡᠭᠡᠷ ᠶᠠᠪᠤᠨᠠ᠃ ᠨᠠᠷᠠᠨ ᠤ ᠠᠯᠳᠠᠨ | ᠰᠠᠴᠤᠷᠠᠭ ᠬᠠᠨᠢ ᠶᠢᠨ ᠮᠢᠨᠢ ᠢᠨᠢᠶᠡᠳᠤ ᠮᠡᠳᠦ ᠢᠯᠴᠢ ᠠᠰᠬᠠᠷᠠᠬᠤ ᠪᠠᠷ ᠲᠤᠷᠠᠰᠤᠨ ᠰᠠᠨᠠᠭᠰᠠᠭᠠᠷ ᠪᠠᠶᠢᠵᠤ ᠲᠡᠷᠡ ᠦᠶᠡ ᠶᠢᠨ ᠵᠤᠯ ᠵᠢᠷᠭᠠᠯᠳᠤ ᠠᠮᠢᠳᠤᠷᠠᠯ ᠳᠠᠭᠠᠨ | ᠡᠷᠭᠢᠵᠦ ᠤᠴᠢᠮᠠᠷ ᠡ︕ ᠠᠯᠳᠠ ᠮᠦᠩᠭᠦ ᠪᠠᠷ ᠬᠦᠮᠦᠨ ᠤ ᠭᠠᠯ ᠬᠠᠯᠠᠭᠤᠨ ᠢᠨᠠᠭ ᠲᠤᠷᠠᠯᠠᠯ ᠲᠠᠢ ᠪᠠᠶᠠᠷ ᠴᠡᠩᠭᠡᠯᠳᠦ ᠠᠮᠢᠳᠤᠷᠠᠯ ᠢ ᠲᠦᠯᠦᠭᠡᠯᠡᠵᠦ ᠲᠡᠶᠢᠯᠬᠦ ᠦᠭᠡᠢ | ᠶᠤᠮ ᠡ᠃ ᠦᠩᠭᠡᠷᠡᠭᠰᠡᠨ ᠲᠡᠷᠡ ᠵᠢᠯ ᠤᠳ ᠲᠤ ᠬᠡᠳᠦ᠋ᠢᠪᠡᠷ ᠠᠮᠢᠳᠤᠷᠠᠯ ᠬᠦᠴᠢᠷᠳᠡᠢ ᠵᠤᠭᠤᠰ ᠮᠦᠩᠬᠦ ᠠᠷᠪᠢᠨ ᠦᠭᠡᠢ ᠪᠤᠯᠪᠠᠴᠤ ᠦᠳᠡᠯᠦᠭᠡ ᠠᠪᠤ ᠡᠵᠢ ᠪᠠᠨ | ᠬᠦᠨᠳᠦᠯᠡᠨ ᠠᠰᠠᠷᠠᠵᠤ᠂ ᠦᠷᠡ ᠬᠡᠦᠬᠡᠳ ᠢᠶᠠᠨ ᠲᠤᠳᠤᠮᠳᠠᠨ ᠦᠰᠭᠡᠵᠦ ᠵᠢᠷᠭᠤᠭᠠᠨ ᠠᠮᠠ ᠪᠠᠷ ᠢᠶᠠᠨ ᠰᠡᠳᠭᠢᠯ ᠠᠮᠤᠷ ᠪᠠᠶᠠᠷ ᠪᠠᠶᠠᠰᠤᠯ ᠲᠠᠢ ᠠᠮᠢᠳᠤᠷᠠᠨ᠂ ᠶᠠᠮᠠᠷ | ᠵᠡᠷᠭᠡ ᠶᠢᠨ ᠡᠳ᠋ ᠬᠦᠷᠦᠩᠭᠡ ᠲᠠᠢ ᠪᠠᠶᠠᠨ ᠠᠶᠢᠯ ᠠᠴᠠ ᠬᠤᠯᠠ ᠵᠤᠯ ᠵᠢᠷᠭᠠᠯ ᠲᠠᠢ ᠪᠠᠶᠢᠭᠰᠠᠨ ᠶᠤᠮ᠃ ᠬᠡᠷᠪᠡ ᠡᠷᠭᠢᠬᠦ ᠲᠦᠷᠦᠯ ᠭᠡᠵᠦ ᠪᠠᠶᠢᠪᠠᠯ ᠡᠨᠡ ᠲᠦᠷᠦᠯ ᠤᠨ | ᠤᠯᠵᠤ ᠡᠳ᠋ᠯᠡᠭᠰᠡᠨ ᠦᠭᠡᠢ ᠪᠤᠶᠠᠨ ᠵᠢᠷᠭᠠᠯ ᠪᠠ ᠬᠠᠶᠢᠷᠠ ᠲᠤᠷᠠᠯᠠᠯ ᠤᠨ ᠪᠠᠶᠠᠷ ᠴᠡᠩᠭᠡᠯ ᠢ ᠬᠠᠨᠢ ᠨᠦᠬᠦᠷ ᠴᠢᠮᠠ ᠳᠠᠭᠠᠨ ᠨᠦᠬᠦᠪᠦᠷᠢᠯᠡᠬᠦ ᠶᠢ ᠪᠤᠷᠬᠠᠨ ᠲᠡᠭᠷᠢ ᠳᠡᠭᠡᠨ | ᠵᠠᠯᠪᠠᠷᠢᠨ ᠲᠠᠭᠠᠳᠬᠠᠶᠠ᠃ | ︽ᠠᠯᠳᠠᠨ ᠪᠡᠶᠡ ᠳᠤ ᠬᠡᠷᠪᠡ | ᠠᠮᠠᠷᠠᠭ ᠰᠡᠳᠭᠢᠯ ᠵᠠᠶᠠᠭᠠ ᠦᠭᠡᠢ ᠪᠤᠯ | ᠠᠯᠠᠵᠤ ᠢᠳᠡᠬᠦ ᠮᠠᠯ ᠪᠢᠰᠢ | ᠠᠮᠢᠳᠤ ᠶᠠᠪᠤᠭᠠᠳ ᠶᠠᠭᠠᠬᠢᠬᠤ ᠪᠤᠢ ᠳ᠋ᠠ︾ | ᠠᠭᠤᠣ ᠰᠢᠯᠦᠭᠴᠢ ᠯᠢ ᠪᠠᠢ ᠶᠢᠨ ᠡᠨᠡ ᠪᠠᠳᠠᠭ ᠦᠭᠡ ᠨᠠᠮᠠ ᠶᠢ ᠬᠡᠵᠢᠶᠡᠳᠡ ᠵᠤᠷᠢᠭᠵᠢᠭᠤᠯᠵᠤ᠂ ᠴᠢᠮᠠ ᠶᠢ ᠦᠨᠢᠳᠡ ᠮᠦᠷᠦᠭᠡᠳᠦᠭᠦᠯᠵᠦ ᠶᠠᠪᠤᠨᠠ᠃ | |