● ᠰ᠊ · ᠪᠦᠬᠡᠴᠢᠯᠠᠭᠤ | | ᠵᠡᠬᠦᠳᠦᠨ ᠲᠤᠳᠤᠷᠠ ᠵᠢᠷᠤᠭ ᠮᠡᠳᠦ ᠠᠯᠳᠠᠨ ᠭᠠᠨᠳᠠᠷᠢ ᠮᠢᠨᠦ | ᠵᠢᠷᠦᠭᠡᠨ ᠲᠤᠳᠤᠷᠡᠬᠢ ᠰᠢᠳᠤᠭᠡᠨ ᠠᠯᠳᠠᠨ ᠭᠠᠨᠳᠠᠷᠢ ᠮᠢᠨᠦ | ᠨᠢᠳᠦ ᠪᠠᠨ ᠠᠨᠢᠭᠠᠳ ᠴᠢᠮᠠ ᠶᠢ ᠦᠭᠡᠶᠢᠯᠡᠬᠦ ᠳᠤ | ᠨᠠᠷᠠ ᠪᠤᠯᠵᠦ ᠵᠢᠷᠦᠭᠡᠨ ᠲᠤᠯᠳᠤ ᠠᠴᠠ ᠤᠷᠭᠤᠨᠠ | ᠨᠠᠢᠮᠠᠨ ᠵᠠᠭᠤᠨ ᠨᠠᠰᠤᠳᠤ ᠲᠡᠦᠭᠡ ᠶᠢᠨ ᠮᠤᠳᠤᠨ ᠤ ᠴᠢᠨᠢ | ᠨᠠᠪᠴᠢ ᠬᠦᠷᠳᠡᠯᠡ ᠰᠢᠪᠠᠭᠤ ᠲᠠᠢ ᠪᠠᠨ ᠬᠤᠤᠰᠯᠠᠨ ᠵᠢᠷᠭᠢᠭᠡᠳ | ᠨᠠᠶᠢᠷᠰᠠᠭ ᠰᠠᠯᠭᠢᠨ ᠤ ᠭᠡᠯᠨ ᠪᠠᠷ ᠲᠦᠷᠪᠡᠨ ᠵᠦᠭ ᠲᠡᠭᠡᠨ ᠤᠶᠠᠩᠭᠠᠷᠠᠨᠠ | ᠨᠢᠳᠦ ᠪᠠᠨ ᠠᠨᠢᠭᠠᠳ ᠴᠢᠮᠠ ᠶᠢ ᠦᠭᠡᠶᠢᠯᠡᠬᠦ ᠳᠤ | ᠰᠠᠷᠠ ᠬᠤᠪᠢᠯᠤᠭᠠᠳ ᠰᠦᠨᠢ ᠶᠢ ᠰᠦᠯᠡᠵᠦ ᠲᠤᠶᠠᠭᠠᠷᠠᠨᠠ | ᠰᠠᠴᠤᠷᠠᠭᠰᠠᠨ ᠮᠦᠩᠬᠦᠨ ᠲᠤᠶᠠᠭᠠ ᠨᠢ ᠲᠤᠪᠴᠢᠶᠠᠨ ᠤ ᠭᠡᠷᠡᠯ ᠮᠡᠳᠦ | ᠰᠡᠳᠭᠢᠯ ᠤᠨ ᠭᠡᠭᠡᠪᠴᠢ ᠪᠠᠷ ᠰᠦ ᠰᠢᠭ ᠠᠰᠬᠠᠷᠠᠭᠠᠳ | ᠰᠡᠭᠡᠭᠡᠷᠡᠭᠰᠡᠨ ᠬᠠᠷᠠᠴᠠᠨ ᠳᠤ ᠮᠦᠷᠦᠭᠡᠳᠦᠯ ᠤᠨ ᠵᠢᠷᠳᠢᠨᠴᠦ ᠲᠤᠳᠤᠷᠠᠨᠠ | ᠨᠢᠳᠦ ᠪᠠᠨ ᠠᠨᠢᠭᠠᠳ ᠴᠢᠮᠠ ᠶᠢ ᠦᠭᠡᠶᠢᠯᠡᠬᠦ ᠳᠤ | ᠨᠠᠢᠮᠠᠨ ᠰᠢᠷᠭᠠ ᠡ᠊ᠩᠭᠡᠷ ᠲᠤ ᠴᠢᠨᠢ ᠤᠩᠭᠤᠯᠳᠤᠨ ᠦᠤᠷᠰᠡᠨᠡ | ᠨᠠᠮᠢᠷᠠᠭᠰᠠᠨ ᠲᠠᠯ ᠨᠢ ᠲᠤᠭ ᠰᠢᠭ ᠦᠭᠡᠳᠡ ᠪᠠᠨ ᠴᠦᠢᠯᠵᠦ | ᠨᠠᠷᠢᠨ ᠭᠤᠤᠯ ᠤᠨ ᠴᠢᠨᠢ ᠤᠷᠤᠰᠬᠠᠯ ᠬᠠᠶᠢᠷᠠ ᠪᠠᠷ ᠬᠠᠯᠭᠢᠯᠠᠭᠠᠳ | ᠨᠠᠮᠬᠠᠷᠠᠰᠢ ᠦᠭᠡᠢ ᠪᠤᠳᠤᠯ ᠮᠢᠨᠢ ᠨᠢᠭᠡᠨ ᠵᠠᠭᠤᠨ ᠳᠤ ᠨᠠᠪᠳᠡᠷᠡᠨᠡ | ᠨᠢᠳᠦ ᠪᠠᠨ ᠠᠨᠢᠭᠠᠳ ᠴᠢᠮᠠ ᠶᠢ ᠦᠭᠡᠶᠢᠯᠡᠬᠦ ᠳᠤ | ᠪᠤᠷᠬᠠᠨ ᠲᠤᠯᠤᠭᠠᠨ ᠤᠳᠤᠨ ᠤᠷᠤᠢ ᠲᠡᠭᠡᠷᠡ ᠴᠢᠨᠢ ᠲᠤᠷᠮᠤᠯᠵᠠᠨᠠ | ᠪᠤᠭᠳᠠ ᠶᠢᠨ ᠭᠡᠭᠡᠨ ᠰᠦᠨᠡᠰᠦ ᠬᠠᠷᠠᠩᠭᠤᠢ ᠶᠢ ᠭᠡᠶᠢᠬᠦᠯᠵᠦ | ᠪᠤᠷᠤ ᠲᠤᠯᠤᠭᠠᠳ ᠲᠤᠳᠤᠷᠠ ᠠᠴᠠ ᠪᠠᠨ ᠡᠭᠢᠯᠡᠵᠦ ᠭᠡᠷᠡᠯᠳᠤᠭᠡᠳ | ᠪᠤᠯᠠᠭ ᠱᠠᠩᠳᠠ ᠡᠷᠳᠡᠨ ᠤ ᠠᠶᠠᠯᠭᠤ ᠬᠦᠭᠯᠡᠨᠡ | ᠨᠢᠳᠦ ᠪᠠᠨ ᠠᠨᠢᠭᠠᠳ ᠴᠢᠮᠠ ᠶᠢ ᠦᠭᠡᠶᠢᠯᠡᠬᠦ ᠳᠤ | ᠨᠡᠬᠦᠳᠡᠯ ᠤᠨ ᠬᠤᠨ ᠴᠡᠩᠭᠡᠷ ᠨᠠᠭᠤᠷ ᠲᠠᠭᠠᠨ ᠨᠤᠷᠭᠢᠯᠳᠤᠨᠠ | ᠨᠢᠩᠵᠢᠨ ᠴᠠᠭᠠᠨ ᠡᠬᠦᠯᠡᠰ ᠬᠤᠷᠠ ᠪᠤᠯᠤᠨ ᠱᠠᠭᠢᠵᠦ | ᠨᠢᠵᠢᠭᠢᠨᠡᠭᠰᠡᠨ ᠲᠦᠪᠡᠷᠭᠡᠨ ᠲᠠᠯᠠ ᠬᠠᠩᠭᠠᠢ ᠠᠴᠠ ᠤᠷᠭᠤᠭᠠᠳ | ᠨᠠᠭᠤ ᠬᠤᠨ ᠤ ᠢᠯᠠᠯᠳᠠ ᠶᠢᠨ ᠤᠤᠬᠠᠢ ᠴᠤᠤᠷᠢᠶᠠᠳᠤᠨᠠ | ᠨᠢᠳᠦ ᠪᠠᠨ ᠠᠨᠢᠭᠠᠳ ᠴᠢᠮᠠ ᠶᠢ ᠦᠭᠡᠶᠢᠯᠡᠬᠦ ᠳᠤ | ᠰᠦᠨᠦᠭᠰᠡᠨ ᠠᠭᠤᠯᠠᠰ ᠤᠨ ᠴᠢᠯᠠᠭᠤᠳ ᠲᠦᠪ ᠦᠭᠡᠳᠡ ᠪᠠᠨ ᠬᠦᠶᠦᠯᠳᠦᠨᠡ | ᠰᠡᠪᠡᠯᠵᠡᠭᠰᠡᠨ ᠵᠢᠪᠠᠷ ᠲᠠᠯᠠ ᠶᠢᠨ ᠰᠢᠷᠬᠠ ᠶᠢ ᠲᠤᠯᠢᠶᠠᠵᠦ ᠡᠳᠡᠭᠡᠭᠡᠳ | ᠰᠢᠬᠦᠳᠡᠷᠢ ᠶᠢᠨ ᠨᠢᠳᠦᠨ ᠳᠤ ᠬᠦᠭᠡ ᠤᠷᠴᠢᠯᠠᠩ ᠡᠷᠭᠢᠯᠳᠦᠬᠦ ᠪᠠᠷ | ᠰᠡᠯᠡᠬᠦᠨ ᠵᠡᠬᠦᠳᠦᠨ ᠳᠤ ᠲᠤᠮᠤᠭ ᠤᠨ ᠪᠠᠭᠠᠳᠤᠷ ᠪᠠᠭᠤᠨᠠ | ᠨᠢᠳᠦ ᠪᠠᠨ ᠠᠨᠢᠭᠠᠳ ᠴᠢᠮᠠ ᠶᠢ ᠦᠭᠡᠶᠢᠯᠡᠬᠦ ᠳᠤ | ᠲᠤᠭᠤᠰᠤ ᠪᠠᠨ ᠬᠦᠪᠢᠵᠦ ᠠᠯᠳᠠᠨ ᠭᠠᠨᠳᠠᠷᠢ ᠮᠢᠨᠢ ᠰᠡᠭᠦ᠋ᠨᠡ | ᠲᠤᠳᠤᠷᠠ ᠨᠢ ᠲᠡᠯᠡᠭᠡᠢ ᠦᠪᠡᠷ ᠤᠨ ᠢᠶᠠᠨ ᠦᠯᠢᠭᠡᠷ ᠢ ᠬᠦᠤᠷᠨᠢᠬᠦ ᠪᠠᠷ | ᠲᠤᠳᠠᠭᠤ ᠪᠠᠨ ᠨᠦᠬᠦᠬᠦ ᠭᠡᠰᠡᠨ ᠰᠠᠨᠠᠭᠠ ᠶᠢ ᠴᠢᠨᠢ ᠲᠤᠭᠤᠷᠤᠤ ᠵᠠᠭᠤᠭᠠᠳ | ᠲᠡᠷᠡ ᠬᠤᠯᠠ ᠶᠢᠨ ᠡᠴᠢᠨᠡ ᠭᠢᠵᠠᠭᠠᠷ ᠲᠤ ᠨᠢᠰᠦᠨᠡ | ᠨᠢᠳᠦ ᠪᠠᠨ ᠠᠨᠢᠭᠠᠳ ᠴᠢᠮᠠ ᠶᠢ ᠦᠭᠡᠶᠢᠯᠡᠬᠦ ᠳᠤ | ᠡᠷᠡ ᠬᠤᠶᠠᠷ ᠵᠠᠭᠠᠯ ᠲᠠᠨᠵᠢᠨ ᠳᠤ ᠴᠢᠨᠢ ᠴᠤᠪᠬᠤᠴᠢᠨᠠ | ᠡᠮᠡᠭᠡᠯ ᠬᠠᠵᠠᠭᠠᠷ ᠤᠨ ᠴᠢᠮᠡᠭᠡ ᠦᠷ ᠢᠶᠠᠷ ᠬᠠᠩᠭᠢᠨᠠᠵᠦ | ᠡᠬᠦᠷᠢᠳᠡ ᠶᠢᠨ ᠨᠢᠭᠡᠨ ᠬᠦᠰᠡᠯ ᠰᠠᠴᠤᠷᠠᠵᠦ ᠲᠡᠷᠭᠡᠯᠰᠢᠭᠡᠳ | ᠡ᠊ᠩ ᠤᠨ ᠪᠠᠶᠢᠬᠤ ᠲᠤᠰᠤᠮ ᠡᠷᠭᠢᠮᠰᠦᠭ ᠰᠠᠨᠠᠭᠳᠠᠨᠠ | ᠨᠢᠳᠦ ᠪᠠᠨ ᠠᠨᠢᠭᠠᠳ ᠴᠢᠮᠠ ᠶᠢ ᠦᠭᠡᠶᠢᠯᠡᠬᠦ ᠳᠤ | ᠲᠡᠭᠷᠢ ᠲᠠᠢ ᠪᠠᠨ ᠴᠢ ᠲᠦᠷᠴᠢᠭᠢᠨᠡᠳᠡᠯᠡ ᠵᠤᠭᠤᠭᠳᠠᠨᠠ | ᠲᠡᠷᠡ ᠵᠤᠭᠤᠭ ᠴᠢᠨᠢ ᠦᠷᠬᠦᠯᠵᠢᠯᠡᠨ ᠦᠷᠬᠦᠯᠵᠢᠯᠡᠭᠰᠡᠭᠡᠷ ᠁ | ᠲᠡᠦᠭᠡ ᠶᠢᠨ ᠦᠨᠡᠨ ᠲᠤᠷᠠᠯᠠᠯ ᠤᠨ ᠦᠭᠡ ᠠᠴᠠ ᠴᠦ ᠠᠮᠳᠠᠳᠠᠢ | ᠲᠤᠷᠠᠳᠠᠢ ᠪᠢ ᠲᠡᠬᠦᠨ ᠠᠴᠠ ᠦᠪᠡᠷ ᠢ ᠪᠠᠨ ᠬᠠᠶᠢᠨᠠ | ᠨᠢᠳᠦ ᠪᠠᠨ ᠠᠨᠢᠭᠠᠳ ᠴᠢᠮᠠ ᠶᠢ ᠦᠭᠡᠶᠢᠯᠡᠬᠦ ᠳᠤ | ᠨᠠᠷᠠ ᠪᠤᠯᠵᠦ ᠵᠢᠷᠦᠭᠡᠨ ᠲᠤᠯᠳᠤ ᠠᠴᠠ ᠤᠷᠭᠤᠨᠠ | ᠨᠠᠢᠮᠠᠨ ᠵᠠᠭᠤᠨ ᠨᠠᠰᠤᠳᠤ ᠲᠡᠦᠭᠡ ᠶᠢᠨ ᠮᠤᠳᠤᠨ ᠤ ᠴᠢᠨᠢ | ᠨᠠᠪᠴᠢ ᠬᠦᠷᠳᠡᠯᠡ ᠰᠢᠪᠠᠭᠤ ᠲᠠᠢ ᠪᠠᠨ ᠬᠤᠤᠰᠯᠠᠨ ᠵᠢᠷᠭᠢᠭᠡᠳ | ᠨᠠᠶᠢᠷᠰᠠᠭ ᠰᠠᠯᠭᠢᠨ ᠤ ᠭᠡᠯᠨ ᠪᠠᠷ ᠲᠦᠷᠪᠡᠨ ᠵᠦᠭ ᠲᠡᠭᠡᠨ ᠤᠶᠠᠩᠭᠠᠷᠠᠨᠠ ᠁ | | |